Viðskipti | mbl | 3.5.2019 | 15:44 | Uppfært 14.10.2024 10:34

Bjóðast til að greiða skuldir þotunnar

Oddur Ástráðsson, lögmaður ALC. mbl.is/Eggert

Bandaríska flugvélaleigufyrirtækið ALC hefur boðið Isavia að greiða skuldir farþegaþotunnar sem hefur verið kyrrsett á Keflavíkurflugvelli frá gjaldþroti WOW air 28. mars. Greitt verði samkvæmt þeim útreikningum sem úrskurður Héraðsdóms Reykjaness frá í gær gefi til kynna.

Þetta staðfestir Oddur Ástráðsson, lögmaður ALC, við mbl.is.

Frétt af mbl.is

Isavia getur ekki krafist tveggja milljarða

Í úrskurði dómsins frá í gær segir að Isavia sé heimilt að aftra brottför vélarinnar vegna þeirra gjalda sem tengjast vélinni sjálfri. Ekki fellur það yfir aðrar skuldir WOW air við Isavia. Vélin sem nú er kyrrsett getur með öðrum orðum ekki verið trygging fyrir tveimur milljörðum eins og hún átti að vera, heldur nemur skuldin við þessa tilteknu vél 87 milljónum samkvæmt útreikningum ALC.

„Í morgun sendum við lögmanni Isavia bréf þar sem við kröfðumst upplýsinga um greiðslustað fyrir þau gjöld sem tengjast TF-GPA. Við ítrekuðum þá útreikninga sem við sjálf höfum unnið úr þeirra gögnum á þeim gjöldum sem tengjast vélinni og eru ógreidd,“ segir Oddur.

ALC fékk afhent hrá gögn frá Isavia og þurfti að lesa út úr þeim hvað áætlaður kostnaður væri varðandi þotuna sem kyrrsett er. Þeir útreikningar bentu til 87 milljóna króna. Oddur segir að skorað hafi verið á Isavia að sýna betri útreikninga ef útreikningar ALC væru ekki taldir réttir.

„Að öðrum kosti lítum við svo á að fjárhæðin er rétt. Við hyggjumst greiða fyrir þotuna og teljum að það sé alveg ljóst af niðurstöðu Héraðsdóms Reykjaness síðan í gær að það eigi að duga til þess að þeim sé nauðugur sá einn kostur að aflétta haldinu á vélinni,“ segir Oddur.

Isavia hefur ekki enn svarað erindi ALC, en frestur var gefinn til klukkan 16 í dag. Ef engin svör berast mun ALC borga samkvæmt sínum útreikningum, 87 milljónir, og álítur vélina þar með lausa úr haldi.