„Óvissan er enn til staðar“
Setja bókamerki
Isavia hefur gripið til ýmissa aðgerða til hagræðingar eftir fall WOW air í lok mars. Fyrir utan uppsagnir hjá dótturfélaginu Fríhöfninni í lok mars hafði engum verið sagt upp þar til fyrr í dag.
„Við höfum dregið úr sumarráðningum og þar fyrir utan hefur verið slegið á frest fyrirhuguðum ráðningum. Síðan höfum við breytt til vaktakerfi og annað slíkt. Auk þess hefur ekki verið ráðið í störf sem hafa losnað,“ segir Guðjón Helgason, upplýsingafulltrúi Isavia, við mbl.is.
Eins og fram kom í tilkynningu frá Isavia í hádeginu var 19 starfsmönnum sagt upp og til viðbótar býðst 15 starfsmönnum lægra starfshlutfall. Aðalástæðan er fall WOW air en einnig breytt flugáætlun Icelandair í kjölfar kyrrsetningar á MAX-vélum Boeing.
Enn er ekki ljóst hvenær hægt verður að aflétta kyrrsetningu á MAX-vélunum en fram kom í svari Ásdísar Pétursdóttur, upplýsingafulltrúa Icelandair, við fyrirspurn mbl.is í gær að ferlið taki lengri tíma en gert hafði verið ráð fyrir. Óvissan hefur áhrif á sumaráætlun Icelandair, sem gildir til 15. september.
Guðjón segir að erfitt sé að segja til um hvort frekari uppsagnir séu í pípunum. „Óvissan er enn til staðar en við getum ekkert tjáð okkur um það frekar á þessari stundu.“
British Airways og Wizz Air eru aftur á móti sögð fjölga ferðum frá London til Íslands í vetur. Spurður hvort vænta mætti frekari hreyfinga á ferðum erlendra flugfélaga til Keflavíkur sagði Guðjón að Isavia væri í stöðugum samskiptum við flugfélög.
„Það má orða það þannig að það er pláss á vellinum.“
Þungt ástand í margar vikur vegna RS-veiru
„Á allt sitt undir því að njóta trausts almennings“
Innanlandsflug liggur niðri
Fundaði með starfsfólki í fjóra tíma í gær
Ríkisstjórnin ekki beint á leiðinni í jólafrí
/frimg/1/41/23/1412311.jpg)
Segja Kínverja hindra framgöngu réttvísinnar