Stefna á fjölda verslana

Hjónin Albert Þór Magnússon og Lóa Dagbjört Kristjánsdóttir hlutu nýverið umboðið fyrir sænsku fataverslunarkeðjuna Lindex og stefna að opnun fyrstu verslunarinnar í haust í verslunarmiðstöðinni Field's í Kaupmannahöfn.

Stefnan hjá þeim hjónum er að almenningur í Danmörku muni þekkja vörumerkið Lindex og að fyrirtækið muni með tímanum hafa svipaða stöðu og það hefur annars staðar á Norðurlöndum en Lindex rekur meðal annars 200 verslanir í Svíþjóð, 90 verslanir í Noregi, 60 verslanir í Finnlandi auk 7 verslana á Íslandi.

Velgengnin hér lykilatriði

Í umfjöllun um áform þessi í ViðskiptaMogganum í dag segir að hjónin hlutu umboðið á Íslandi árið 2011 og frá þeim tíma hefur reksturinn gengið afar vel en rekstrartekjur fyrirtækisins námu 1,4 milljörðum króna árið 2017. Segir hann að fyrst um sinn hafi ekki komið til greina að veita umboð fyrir Danmerkurmarkað en að svarið hafi breyst með tíð og tíma og að velgengnin hér á landi hafi verið lykilatriði. „Ég held að þetta hefði aldrei komið til hefði Íslandsreksturinn ekki gengið vel. Við hefðum aldrei komið til greina“.