Hefja áætlunarflug til Tenerife og Las Palmas

Flugfélagið Norwegian ætlar að hefja áætlunarflug milli Íslands og Las Palmas og Tenerife í haust. 

Í tilkynningu frá flugfélaginu kemur fram að  30. október mun Norwegian fljúga tvisvar í viku, á miðvikudögum og laugardögum, til Las Palmas á Kanaríeyjum. Frá 27. október mun Norwegian fljúga fimm sinnum í viku milli Keflavíkurflugvallar og Tenerife. Flogið verður á mánudögum, þriðjudögum, fimmtudögum, laugardögum og sunnudögum.

Til stendur að fljúga á báðum þessum flugleiðum út árið. Norwegian hóf áætlunarflug milli Íslands og Spánar á árinu 2016.

Haft er eftir aðstoðarforstjóra Norwegian, Magnus Thome Maursund, að með því að bæta við þessum tveimur flugleiðum milli Íslands og Spánar sé flugfélagið með leiðandi stöðu á flugferðum milli Íslands og Spánar.

Áætlunarflug Norwegian frá Íslandi: 

Reykjavík – Las Palmas
Reykjavík - Tenerife
Reykjavík – Madrid
Reykjavík – Barcelona
Reykjavík – Alicante
Reykjavík - Ósló
Reykjavík – Bergen

• Blogga um frétt