Viðskipti | mbl | 10.7.2019 | 18:40

Íslandsbanki opnar á Apple Pay

Íslandsbanki fetar í fótspor hinna bankanna. Ljósmynd/Íslandsbanki

Viðskiptavinir Íslandsbanka geta nú tengt kredit- og debetkort sín við Apple Pay og greitt fyrir vörur og þjónustu með iPhone, Apple Watch, iPad og Mac.

Landsbankinn og Arion banki riðu fyrstir íslenskra banka á vaðið í maí, en vinna var þá þegar hafin hjá Íslandsbanka við að bjóða sömu þjónustu fyrir korthafa bankans.

Bankarnir taka Apple Pay í notkun

Það ferli gengur ekki þrautalaust fyrir sig, líkt og Helgi Teitur Helgason, framkvæmdastjóri einstaklingssviðs Landsbankans, fékk að reyna og greindi frá í samtali við mbl.is á dögunum.

„Það er ekkert símanúmer hjá Apple“

Í óformlegu spjalli blaðamanns mbl.is við starfsmenn Íslandsbanka segja þeir allir að mikið hafi verið spurt út í Apple Pay undanfarnar vikur: hvers vegna bankinn hafi ekki þegar tekið þjónustuna í notkun eins og hinir stóru bankarnir, og hversu lengi þeir þurfi eiginlega að bíða. En nú er sú bið sumsé á enda.

Landsmenn hafa tekið nýjunginni fagnandi enda um þægilega lausn að ræða; í stað þess að þurfa að burðast með veskið og draga fram kortið, er síminn —sem er jú alltaf við höndina — einfaldlega lagður að posanum, með þumal á fingrafararskannanum, og greiðslan gengur í gegn.

Talið að um 40 þúsund íslensk kort hjá Arion og Landsbankanum hafi verið skráð í kerfið á fyrstu fimm vikunum. Rétt er þó að taka framað hver notandi getur haft nokkur kort á skrá.