Hálfur milljarður í arð

Miklatorg, sem á og rekur IKEA á Íslandi, hagnaðist um 528 milljónir króna á síðasta rekstrarári. Hagnaðurinn dróst verulega saman frá fyrra ári þegar hann nam 982 milljónum króna.

Stjórn félagsins lagði fyrir aðalfund tillögu um greiðslu 500 milljóna króna arðs út úr félaginu. Er það annað árið í röð sem tillaga um slíka arðgreiðslu er borin upp og samþykkt. Árið 2016 nam arðgreiðsla út úr félaginu 900 milljónum króna, að því er fram kemur í ViðskiptaMogganum í dag.

Síðasta áratuginn nema arðgreiðslur Miklatorgs til eigenda sinna tæpum 3,5 milljörðum króna. Bræðurnir Jón og Sigurður Gísli Pálmasynir eiga IKEA á Íslandi. Á undanförnum árum hafa þeir einnig byggt upp mikil umsvif í tengslum við sömu starfsemi í Eystrasaltsríkjunum.

IKEA á Íslandi var opnað árið 1981 og var þá deild í Hagkaupum. Frá árinu 2006 hefur félagið verið með starfsemi í ríflega 20 þúsund fermetra verslun í Kauptúni í Garðabæ.