Hlutabréfaverð í Icelandair féll um 6,93% á markaði í dag og stóð gengi bréfa við lok markaðar í 6,98 krónum á hlut. Er það lægsta gengi félagsins í dagslok það sem af er ári, en bréfin hafa fallið í verði um 26% frá áramótum.
Icelandair tapaði um 89,4 milljónum Bandaríkjadala, um 11 milljörðum króna, á fyrstu sex mánuðum ársins samkvæmt hálfsársuppgjöri félagsins sem birt var í byrjun ágúst. Jókst tap félagsins frá sama tímabili í fyrra um nærri 50%.
Tapið má að stórum hluta rekja til vandræða sem tengjast kyrrsetningu Boeing MAX-vélanna, en Bogi Nils Bogason, forstjóri Icelandair, segir markmið félagsins að fá það tjón bætt frá flugvélaframleiðandanum.