Stýrivaxtalækkun til móts við samdrátt

Samtök iðnaðarins (SI) telja að full ástæða sé fyrir peningastefnunefnd Seðlabankans að stíga annað skref í lækkun stýrivaxta við næstu vaxtaákvörðun, sem kynnt verður 28. ágúst.

Þetta kemur fram í nýútkominni hagfræðilegri greiningu SI. Samkvæmt þeirri greiningu er að finna skýr merki um samdrátt í hagkerfinu eftir átta ár af samfelldum hagvexti.

„Verðbólga og verðbólguvæntingar hafa haldist við markmið um nokkurn tíma og gefur það Seðlabankanum svigrúm til að lækka vexti til þess að hjálpa fyrirtækjum og heimilum að takast á við niðursveifluna. Seðlabankinn hefur lækkað vexti um 0,75 prósentur síðan í maí á þessu ári. Meginvextir Seðlabankans, þ.e. vextir á sjö daga bundnum innlánum, eru nú 3,75% og er nægt svigrúm til að lækka þá,“ segir í greiningu SI, sem um er fjallað í Morgunblaðinu í dag.