Heildarfjöldi greiddra gistinátta í júlí dróst saman um 1% milli 2018 og 2019. Á hótelum og gistiheimilum varð aukning um 1,7%, á stöðum sem miðla gistingu gegnum Airbnb og svipaðar síður varð fækkun um 5,1%, og gistinóttum á öðrum tegundum gististaða fækkaði um 3,0%. Þetta kemur fram á vef Hagstofu Íslands. 

Greiddar gistinætur ferðamanna á öllum gististöðum voru um 1.558.000 í júlí síðastliðnum, en þær voru um 1.576.000 í sama mánuði í fyrra. Gistinætur á hótelum og gistiheimilum voru 716.800, þar af 492.400 á hótelum og 224.400 á gistiheimilum. Gistinætur í íbúðagistingu, farfuglaheimilum, tjaldsvæðum o.þ.h. voru um 599.000 og um 242.000 í gegnum vefsíður á borð við Airbnb.

Gistinætur á hótelum í júlí síðastliðnum voru 492.400, sem er 1% fjölgun frá sama mánuði árið áður. Gistinætur á hótelum á höfuðborgarsvæðinu voru 5% færri en í júlí í fyrra, en þeim ýmist fjölgaði eða þær stóðu í stað í öðrum landshlutum. Um 47% allra hótelgistinátta voru á höfuðborgarsvæðinu, eða 232.500, en voru 243.500 í fyrra.

Á tólf mánaða tímabili, frá ágúst 2018 til júlí 2019, var heildarfjöldi gistinátta á hótelum um 4.400.000, sem er 1% aukning miðað við sama tímabil árið áður.

Frétt Hagstofu Íslands

Tengdar fréttir

Sviptivindar í flugrekstri

Gefur Icelandair aukin tækifæri

• Verktökum í nýrri byggingu Icelandair boðið í kaffi
• Bláfugl sagt hafa skilað flugrekstarleyfi
• Ernir hyggst skila inn flugrekstrarleyfi
• Fjórtán segja upp hjá Play

» Fleiri tengdar fréttir

• Blogga um frétt