Smálánin fyrir úrskurðarnefnd

Endanleg niðurstaða um það hvort smálán fyrirtækisins Commerce 2020 heyri undir íslensk eða dönsk lög fæst frá úrskurðarnefnd neytendamála. Fyrirtækið býður íslenskum neytendum upp á smálán í gegnum þjónusturnar 1909, Hraðpeninga, Kredia, Múla og Smálán.

Neytendastofa úrskurðaði nýverið að fyrirtækinu bæri að fara eftir íslenskum lögum við gerð neytendasamninga sinna. Commerce 2020, sem hefur aðsetur í Danmörku, telur nauðsynlegt að fá skorið úr þessu lagalega álitaefni.

„Þangað til úrskurður fæst munum við að sjálfsögðu halda áfram að gera okkar til þess að samstarfið við Neytendastofu verði sem best,“ segir Ondrej Smakal, forstjóri fyrirtækisins, í umfjöllun um mál þetta í Morgunblaðinu í dag.