„Forréttindi að geta lækkað vexti“

„Íslenska hagkerfið er á leið í niðursveiflu eftir 8 ára samfelldan vöxt. Það verður vægur samdráttur, 0,2% á þessu árið og búist er við að hagkerfið taki aftur við sér á næsta ári,“ sagði Ásgeir Jónsson seðlabankastjóri á opnum fundi efnahags- og viðskiptanefndar Alþingis sem fer nú fram.

Ásamt Ásgeiri er Gylfi Zoëga, fulltrúi í peningastefnunefnd Seðlabankans einnig gestur efnahags- og viðskiptanefndar og umræðuefnið er skýrsla peningastefnunefndar Seðlabanka Íslands fyrir fyrri hluta árs 2019.

Það fór vel á með Willum Þór Þórssyni og Gylfa Zoega fyrir fundinn. mbl.is/Eggert Jóhannesson

Ásgeir er á sínum fyrsta fundi nefndarinnar sem seðlabankastjóri og hófst fundurinn á því að formaður nefndarinnar Óli Björn Kárason, fulltrúi Sjálfstæðisflokksins, óskaði honum til hamingju með nýja starfið. Ásgeir byrjaði á því að fara yfir stöðuna hér á landi og fór yfir það sem kom fram á fundi peningastefnunefndar í ágúst.

„Peningastefnunefnd hefur hafið vaxtalækkunarferli, gengi krónu er nokkuð stöðugt þrátt fyrir áföll í hagkerfinu og að hægt hafi á hagkerfinu,“ sagði hann og bætti við:

„En við erum með sterkar stoðir og Seðlabanki Íslands býr yfir sterkum gjaldeyrisforða. Það þykja forréttindi að geta lækkað vexti meðal vestrænna ríkja.“

• Blogga um frétt