Viðskipti | mbl | 1.11.2019 | 9:59 | Uppfært 13:00

Icelandair væntir frekari bóta frá Boeing

Icelandair gerir ráð fyrir frekari bótum frá Boeing vegna kyrrsetningu MAX-8-vélanna. mbl.is/Eggert Jóhannesson

Nýtt samkomulag var gert milli Icelandair og Boeing í gær vegna kyrrsetningar MAX-8-vélanna og mun það samkomulag koma fram í uppgjöri Icelandair á næsta ári. Þetta sagði Bogi Nils Bogason, forstjóri Icelandair, á kynningarfundi vegna uppgjörs þriðja ársfjórðungs á Hótel Natura í morgun.

Hann sagði jafnframt viðræður um frekari skaðabætur vegna kyrrsetningarinnar enn í gangi og gert sé ráð fyrr að vélarnar verði kyrrsettar út febrúarmánuð. Af þeim 14 vélum sem teknar voru úr umferð gerir félagið ráð fyrir að níu verði í notkun næsta sumar, nema til frekari frestunar komi sem félagið telur að ekki verði.

Frétt af mbl.is

Hagnaður Icelandair 7,5 milljarðar

MAX-8-áhrif ekki birt framvegis

Þá hyggst Icelandair ekki birta frekari upplýsingar um áhrif stöðu MAX-8-vélanna á reksturinn eins og gert hefur verið áður þar sem viðræður við Boeing standi enn yfir. „Þessar viðræður hafa gengið ágætlega,“ sagði Bogi Nils.

Fram kom í máli Evu Sóleyjar Guðbjörnsdóttur, fjármálastjóra Icelandair, að inni í uppgjöri fyrir þriðja ársfjórðung hafi verið bætur frá bótum, en sem fyrr segir væntir félagið frekari bóta frá Boeing.