Þorsteinn Már Baldvinsson, einn eigenda Samherja, hefur sagt sig úr stjórn útgerðarfélagsins Framherja í Færeyjum, en Þorsteinn var jafnframt stjórnarformaður félagsins. Frá þessu er greint á færeyska fréttavefnum in.fo. Samherji á fjórðungshlut í félaginu, en það er eitt stærsta útgerðarfélag Færeyinga. Kom Samherji að stofnun þess árið 1994 og gerir það nú út þrjá togara frá Fuglafirði.

Á laugardaginn hafði Vísir eftir Björgólfi Jóhannssyni, starfandi forstjóra Samherja, að ekki hefði verið tekin ákvörðun um það hvort Þorsteinn myndi segja sig frá stjórnarformennsku í Framherja. Þorsteinn steig í síðustu viku til hliðar sem forstjóri Samherja í kjölfar þess að starfsemi Samherja kom til skoðunar vegna starfshátta félagsins í Namibíu og meintra mútugreiðslna sem Kveikur sagði frá í síðustu viku.

Á vef in.fo kemur fram að Árni Absalonsen hafi komið inn í stjórnina í stað Þorsteins og þá hafi Elisabeth D. Eldevig Olsen verið skipuð stjórnarformaður Framherja.

Tengdar fréttir

Samherji í Namibíu

Vilja skoða tölvu Jóhannesar

• Þúsundir smáskilaboða fundust í tölvu
• Vandar Jóhannesi ekki kveðjurnar
• Óvíst hvort niðurstaðan verður kærð
• Yfirframleiðandinn kominn með stöðu sakbornings

» Fleiri tengdar fréttir

• Blogga um frétt