Jón Ásgeir Jóhannesson fjárfestir hefur tekið sæti stjórnarformanns í Skeljungi. Aðalfundur félagsins fór fram í gær og var ný stjórn kosin sem síðan skipti með sér verkum. Jón Ásgeir, sem áður var varastjórnarformaður félagsins, tekur við af Jens Meinhard Rasmussen, en hann gaf ekki kost á sér áfram í stjórninni. Greint er frá nýrri stjórn á heimasíðu félagsins.
Auk Jóns Ásgeirs voru kjörin í stjórn þau Birna Ósk Einarsdóttir, stjórnarmaður og sölu- og þjónustustjóri Icelandair, Þórarinn Arnar Sævarsson, stjórnarmaður, fjárfestir og einn eiganda RE/MAX fasteignasölunnar, Dagný Halldórsdóttir, sem hefur meðal annars komið að stjórnun DH Samskipta, Pyngjunnar (nú SíminnPay), Neyðarlínunnar, Íslandssíma (nú Vodafone) og Skimu og Elín Jónsdóttir, stjórnarformaður Borgunar og áður framkvæmdastjóri hjá Íslandsbanka.
Þau Birna Ósk og Þórarinn voru áður í stjórninni og buðu sig að nýju fram, en Dagný og Elín koma nýjar inn.
Höskuldur Ólafsson, fyrrverandi forstjóri Arion banka, hafði boðið sig fram en dró framboð sitt til baka fyrir aðalfundinn. Þá höfðu þeir Jón Gunnar Borgþórsson, sjálfstæður ráðgjafi, og Már Wolfgang Mixa, aðstoðarprófessor í fjármálum við Háskólann í Reykjavík, boðið sig fram, en þeir hlutu ekki kjör í stjórnina.
Var niðurstaðan í samræmi við tillögur tilnefningarnefndar Skeljungs sem skilað var fyrir aðalfundinn.
Mikil lækkun hefur verið á hlutabréfamarkaðinum á Íslandi í dag. Hafa bréf Skeljungs meðal annars lækkað um 4,13% í 53 milljóna króna viðskiptum. Öll önnur félög hafa einnig lækkað.