Arion banki lækkar vexti

Arion banki lækkar vexti á íbúðalánum og bílalánum auk þess sem kjörvextir bankans verða lækkaðir.

Þetta kemur fram í tilkynningu frá bankanum en í henni segir að áform stjórnvalda um að lækka bankaskatt skapi svigrúm til breytinga á vöxtum, til hagsbóta fyrir viðskiptavini.

„Bankaskattur leggst með beinum hætti á fjármögnun banka og hefur því neikvæð áhrif á þau vaxtakjör sem bankar geta boðið sínum viðskiptavinum. Bankaskattur hér á landi er töluvert hærri en í nágrannalöndum okkar og verður það enn þrátt fyrir fyrirhugaða lækkun,“ segir í tilkynningunni. 

Lækkun bankaskattsins geri bankanum kleift að lækka vexti á verðtryggðum og óverðtryggðum íbúðalánum sem og kjörvexti bankans um 0,15% frá og með 1. apríl.

Helstu breytingar eru því eftirfarandi:

Verðtryggð íbúðalán

• Verðtryggðir fastir vextir til 5 ára eru 2,79% en verða 2,64%
• Verðtryggðir breytilegir vextir eru í dag 3,19% en verða 3,04%

Óverðtryggð íbúðalán

• Óverðtryggðir fastir vextir til 5 ára eru 5,24% en verða 5,09%
• Óverðtryggðir breytilegir vextir eru 4,19% en verða 4,04%

Bílalán

• Óverðtryggðir kjörvextir bílafjármögnunar eru 5,65% verða 5,50%

Kjörvextir

• Óverðtryggðir kjörvextir eru 5,25% en verða 5,10%
• Verðtryggðir kjörvextir eru 4,05% en verða 3,90%

• Blogga um frétt