Ragnhildur Þrastardóttir
Stjórnvöld hafa hvorki lofað Icelandair neinni sérstakri ríkisaðstoð né sett fram nein skilyrði vegna mögulegrar aðstoðar, að sögn Sigurðar Inga Jóhannssonar, samgöngu- og sveitastjórnarráðherra. Stjórnvöld hafa ekki tekið ákvörðun um að útiloka ríkisaðstoð ef flugfélaginu tekst ekki að safna nýju hlutafé.
„Við erum auðvitað að fylgjast með vegna þess að auðvitað er þetta mikilvægt fyrirtæki sem við höfum metið sem svo. Boltinn er í höndum stjórnar félagsins, lánveitenda og allra sem þar að koma.“
Spurður hvað þurfi að koma til svo ríkið aðstoði Icelandair segir Sigurður Ingi:
„Við höfum fyrst og fremst fylgst með fyrirtækinu. Það er á markaði og vinnur fyrir opnum tjöldum með allt sem það er að gera.“
Bogi Nils Bogason, forstjóri Icelandair, sagði í samtali við mbl.is í gær að félagið vinni nú að „markaðslausn í samráði við stjórnvöld.“ Markaðslausnin felur í sér að „í framhaldi af því að efnahagsreikningur félagsins sé styrktur með nýju hlutafé frá fjárfestum, komi ríkið hugsanlega með lánsfjármagn að borðinu.“
Spurður hvort útilokað sé að Icelandair fái ríkisaðstoð ef flugfélaginu tekst ekki að safna nýju hlutafé segir Sigurður Ingi: „Við höfum ekki sett það niður fyrir okkur.“