Viðskipti | mbl | 30.4.2020 | 6:33 | Uppfært 9:40

Fresta frágangi á kaupum á College Park

Ljósmynd/Aðsend

Hagnaður Össurar nam 7 milljónum Bandaríkjadala, 1 milljarði íslenskra króna, á fyrsta ársfjórðungi og var 5% af veltu. COVID-19-heimsfaraldurinn hafði áhrif á rekstrarniðurstöður félagsins en sala dróst saman í mars.

Frétt af mbl.is

Hagnaður Össurar jókst um 37%

Össur hefur frestað frágangi á kaupum á stoðtækjaframleiðandann College Park. Þetta kemur fram í afkomutilkynningu Össurar í morgun.

COVID-19-heimsfaraldurinn hafði áhrif á rekstrarniðurstöður í fyrsta ársfjórðungi 2020.
Sala í fyrsta ársfjórðungi nam 154 milljónum Bandaríkjadala (20 milljörðum íslenskra króna). Sala lækkaði um 2% í staðbundinni mynt og innri vöxtur var neikvæður um 5%. Sala dróst saman í mars á þeim mörkuðum sem ráðstafanir voru gerðar til takmarkanna á útbreiðslu COVID-19-heimsfaraldursins.

Sala dróst saman um 4% á stoðtækjum og 7% á spelkum og stuðningsvörum. Áhrifin af COVID-19 í fyrsta ársfjórðungi voru svipuð á sölu á stoðtækjum og sölu á spelkum & stuðningsvörum.
EBITDA í fyrsta ársfjórðungi nam 22 milljónum Bandaríkjadala (3 milljörðum íslenskra króna) eða 14% af sölu. EBITDA-framlegð lækkaði vegna lægri sölu í fjórðungnum. Ákveðnar ráðstafanir hafa verið gerðar til að draga úr kostnaði til skamms tíma.
Hagnaður ársins nam 7 milljónum Bandaríkjadala (1 milljarði íslenskra króna) og var 5% af veltu.
Fjárhagsáætlun félagsins fyrir árið 2020 var afturkölluð 17. mars vegna þeirrar óvissu sem ríkir í tengslum við COVID-19 faraldurinn.
Össur keypti 1,295,450 eigin bréf í gegnum endurkaupaáætlun félagsins fyrir 9 milljónir Bandaríkjadala (1 milljarð íslenskra króna). Endurkaupum á eigin bréfum hefur verið hætt tímabundið á meðan óvissa ríkir vegna COVID-19.
Þann 7. apríl fékk Össur samþykkt frá bandarískum samkeppnisyfirvöldum (FTC) að kaupa stoðtækjaframleiðandann College Park. Í ljósi þeirrar óvissu sem ríkir vegna COVID-19 hefur verið gert samkomulag um að fresta frágangi á endanlegum kaupum en stefnt er að ljúka þeim innan þriggja mánaða.
Fjárhagsstaða Össurar er sterk, en félagið tryggði sér aukna fjármögnun upp á 225 milljónir Bandaríkjadala (29 milljarðar íslenskra króna) í mars og stóðu sjóðir félagsins auk ódreginna lánalína í 304 milljónum Bandaríkjadala (39 milljarðar íslenskra króna) í lok fjórðungsins.

Tímabundin neikvæð áhrif

Jón Sigurðsson, forstjóri Össurar. mbl.is/Eggert Jóhannesson

Jón Sigurðsson, forstjóri Össurar segir í tilkynningu: „COVID-19 heimsfaraldurinn hefur haft áhrif á rekstur Össurar og höfum við haft öryggi og helbrigði starfsmanna og viðskiptavina í fyrirrúmi. Núverandi eftirspurn er mætt en starfsmenn framleiðslunnar vinna á vaktaskiptum og flestir skrifstofu- og sölustarfsmenn starfa að heiman.

Faraldurinn hefur tímabundið neikvæð áhrif á eftirspurn eftir stoðtækjum og spelkum & stuðningsvörum vegna takmarkanna sem sett hafa verið á sumum mörkuðum til að hamla útbreiðslu á faraldrinum.

Rekstrarniðurstöður félagsins hafa þar af leiðandi orðið fyrir neikvæðum áhrifum og enn er óljóst hversu lengi áhrifin munu vera viðvarandi. Söluvöxtur á fyrstu tveimur mánuðum ársins voru í takt við væntingar en sala byrjaði að verða fyrir neikvæðum áhrifum sökum faraldursins í mars.

Við sjáum einnig töluverð áhrif á sölu það sem af er apríl en við erum þegar farin að sjá merki um bata í nokkrum af helstu mörkuðum okkar í Evrópu og sala í Kína var í apríl aftur á pari við 2019. Ekki er gert ráð fyrir að langtímahorfur í stoðtækja- og spelku- & stuðningsmarkaðinum breytist en þó má ætla að áhrifin af faraldrinum munu leiða til uppsafnaðrar eftirspurnar.

Mikil óvissa ríkir enn um horfur fyrir árið 2020 og getum við því ekki veitt uppfærða fjárhagsáætlun fyrir árið á þessum tímapunkti. Ég undirstrika þó að við erum fjárhagslega vel í stakk búin til að takast á við þessa óvissutíma. Ég vil þakka öllum starfsmönnum og viðskiptavinum félagsins fyrir sveigjanleika, jákvæðan teymisanda og framlag þeirra á þessum fordæmalausu tímum.“