Kristján H. Johannessen
Icelandair mun, samkvæmt flugáætlun sem gildir til 19. júlí næstkomandi, fljúga til 26 áfangastaða í Evrópu og Norður-Ameríku.
Á heimasíðu flugfélagsins er vakin athygli á því að hægt sé að bóka flug á dagsetningum eftir fyrrgreinda áætlun. Verði flugið hins vegar fellt niður segist félagið munu koma viðkomandi farþega á áfangastað.
Ásdís Ýr Pétursdóttir, upplýsingafulltrúi Icelandair, segir ómögulegt að segja til um það núna hvort þessi fjöldi áfangastaða muni breyta uppsögnum starfsfólks. Ástandið sé enn viðkvæmt og óvissan mikil.
„Við erum að fara mjög rólega af stað og það er mikil óvissa. Það plan sem við settum upp frá 15. til 30. júní gerir ráð fyrir 11 áfangastöðum. Í júlí gerum við svo ráð fyrir að fjölga áfangastöðum talsvert en það er þó háð ýmsu,“ segir Ásdís Ýr m.a. í Morgunblaðinu í dag