Kísilverksmiðja PCC á Bakka hefur ákveðið að stöðva tímabundið framleiðslu sína vegna verulegra neikvæðra áhrifa á verð og eftirspurn kísilmálms á heimsmarkaði. Er það rakið til áhrifa frá kórónuveirufaraldrinum. Þá verður stórum hluta starfsfólks fyrirtækisins sagt upp.

Framleiðslan verður stöðvuð þangað til markaðurinn nær sér á strik á ný. Þetta kemur fram í tilkynningu frá félaginu.

Þar segir að í lok júlí verði slökkt á báðum ofnum verksmiðjunnar, en starfsmenn og trúnaðarmenn þeirra hafa verið upplýstir um ákvörðunina.

Ítrekað er að um tímabundnar aðgerðir sé að ræða og að félagið geri ráð fyrir að endurráða starfsfólk þegar framleiðslan fari af stað.

Haft er eftir Rúnari Sigurpálssyni, forstjóra fyrirtækisins, að ekki hafi fundist önnur leið. „Það var erfitt að taka þessa ákvörðun og hefðum við fundið raunhæfa leið til að forðast uppsagnir hefðum við farið hana. Ég er hins vegar viss um að heimsmarkaðurinn muni taka við sér að nýju. Þegar það gerist munum við setja uppgerða verksmiðjuna aftur í gang og ráða aftur eins margt af fólkinu okkar og við getum.“

Á meðan slökkt verður á ofnunum verður viðhaldi og endurbótum á hreinsivirki sinnt. Það felur meðal annars í sér að hluti þaksins verður fjarlægður og nýjum tækjabúnaði komið fyrir. Þessari viðhalds- og endurbótavinnu ætti að vera lokið í ágústlok 2020.

Tengdar fréttir

Kísilver PCC á Bakka

Allt „samkvæmt áætlun“ hjá PCC á Bakka

• Fyrsti hráefnisfarmurinn til kísilversins
• Vel gengur að endurráða starfsfólk
• Niðurfærsla upp á 11,6 milljarða
• Vilja innflutningstolla á kísilmálm frá Íslandi

» Fleiri tengdar fréttir

Kórónukreppan

Áfangaheimilinu lokað ef ekki er gripið inn í

• „Þetta er allt saman á fleygiferð“
• Of harðar aðgerðir í faraldrinum
• Sjá fram á minna atvinnuleysi
• „Það er best að hafa samræmi í þessu“

» Fleiri tengdar fréttir

• 1 blogg um fréttina

Bloggað um fréttina

• Ómar Ragnarsson: Sýnir áhrif drepsóttarinnar.