Hlutabréf Icelandair Group hafa lækkað um 42% í Kauphöll Íslands í morgun. Gengi bréfanna er nú komið niður fyrir eina krónu á hlut. Síðustu viðskipti með bréf Icelandair voru á genginu 0,95 og hefur verð þeirra sjaldan verið svo lágt. Fyrr í morgun voru viðskipti með bréf félagsins á genginu 0,90 og er það lægsta verð sem hefur fengist fyrir hlutabréf í Icelandair ef horft er ár aftur í tímann. Athuga ber að ekki er um lokaverð dags að ræða og því mögulegt að bréfin eigi eftir að rétta úr kútnum fyrir lok dags. Síðustu sex mánuði hefur verð hlutabréfa Icelandair lækkað um 88,55%.
Eins og greint var frá í gær þá hefur tímalína hlutafjárútboðs Icelandair verið uppfærð og er nú stefnt að því að útboðið fari fram í september, með fyrirvara um samþykkt hluthafa um að framlengja heimild félagsins til hlutafjáraukningar, en heimild sem veitt var á hluthafafundi 22. maí síðastliðinn rennur út 1. september. Mun félagið því boða til nýs hluthafafundar á næstu dögum.
Fram kom í tilkynningu, að Icelandair Group stefndi að því að selja nýja hluti fyrir 20 milljarða króna að nafnverði á genginu 1 króna á hlut. Fyrstu viðskiptin með Icelandair í Kauphöll Íslands í dag voru á genginu 1,3 eða töluvert hærra gengi en stefnt er að í útboðinu.