Icelandair birtir kynningargögn fyrir útboð
Setja bókamerki
Icelandair Group birti í kvöld í Kauphöll kynningargögn fyrir fyrirhugað hlutafjárútboð félagsins. „Viðskiptamódel Icelandair Group hefur margsannað sig og við förum bjartsýn inn í það hlutafjárútboð sem nú er framundan,“ er haft eftir Boga Nils Bogasyni, forstjóra Icelandair, í tilkynningu.
Í kynningargögnunum, sem eru 101 blaðsíða, er meðal annars rakið hvernig nýir kjarasamningar við flugmenn og -freyjur styrki samkeppnisstöðu félagsins, auk þess sem ríkisábyrgð á lánalínu tryggi stöðu þess verulega.
Samkvæmt kynningargögnunum fer útboðið fram 14. og 15. september. Er það þó gert með fyrirvara um samþykki hluthafa um að endurnýja heimild félagsins til hlutafjáraukningar. Hluthafafundur verður haldinn 9. september. Gert er ráð fyrir að skráningarlýsing verði birt í næstu viku.
„Kórónuveirufaraldurinn hefur haft gríðarleg áhrif á félagið á liðnum mánuðum líkt og öll önnur flugfélög í heiminum. Fjárhagsstaða félagsins var góð áður en faraldurinn skall á og í kjölfar þeirra aðgerða sem við höfum gripið til og þeirra áætlana sem við höfum gert til framtíðar, hefur félagið alla burði til að koma sterkt út úr honum. Félagið býr yfir verðmætum innviðum, frábæru starfsfólki og mikilvægum viðskiptasamböndum. Þá er leiðakerfi Icelandair sveigjanlegt og byggir á einstakri staðsetningu Íslands sem tengimiðstöðvar á milli Norður Ameríku og Evrópu,“ er haft eftir Boga Nils.
„Icelandair gegnir lykilhlutverki í flugi til og frá Íslandi og mun, hér eftir sem hingað til, leggja áherslu á að tryggja öflugar flugsamgöngur og um leið aukin lífsgæði hér á landi. Ísland verður áfram eftirsóttur áfangastaður og við búumst við að tækifæri skapist á ný fyrir tengiflug yfir Atlantshafið þegar fram í sækir. Við leggjum höfuðáherslu á arðsemi leiðakerfisins og að viðhalda sveigjanleika til að geta brugðist hratt við breytingum á markaði. Í kjölfar hlutafjárútboðsins verður félagið enn betur í stakk búið til að grípa þau tækifæri sem gefast þegar eftirspurn eftir flugi eykst á ný.“
Ekki hægt að slá gosið út af borðinu strax
Koma fyrstu tölur á sunnudagskvöldið?
Sendi nektarmyndir af dreng sem hann passaði
Hvatti kjósendur til þess að greiða ógild atkvæði
Létu lofthræðsluna ekki á sig fá
Dæla, kæla og verja mikilvæg mannvirki
„Við vöknuðum við hljóð frá sprengingum“