Viðskipti | mbl | 28.8.2020 | 15:55

Fulltrúar Play viðstaddir fund um ríkisábyrgð

Spurður hvort gagnrýni á frumvarpið hafi komið frá fulltrúum Play segir Haraldur: „Já. Það komu fram mörg sjónarmið sem eru áhugaverð.“ mbl.is/Hari

Fulltrúar flugfélagsins Play voru gestir á fundi fjárlaganefndar Alþingis í morgun þar sem ríkisábyrgð á lánalínu til Icelandair var rædd, að sögn Haralds Benediktssonar, varaformanns fjárlaganefndar og þingmanns Sjálfstæðisflokksins. Á fundinum var frumvarpið kynnt og forsendum þess gerð skil.

„Við erum bara rétt að hefja vinnuna við þetta en þetta er kannski ekki alveg einfaldasta málið sem við stöndum frammi fyrir,“ segir Haraldur um frumvarpið.

Hann jánkar því að mörgum spurningum sé enn ósvarað. „Við eigum eftir að eiga viðræður við fleiri aðila til þess að meta málið en [Icelandair] er gríðarlega mikilvægt íslensku atvinnulífi. Það má aldrei gleyma því.“

Frétt af mbl.is

Vonar að Icelandair spjari sig án ríkisábyrgðar

Mörg sjónarmið hafi komið fram

Spurður hvort gagnrýni á frumvarpið hafi komið frá fulltrúum Play segir Haraldur: „Já. Það komu fram mörg sjónarmið sem eru áhugaverð og við þurfum að vega og meta. Við erum með þetta stóra og mikilvæga fyrirtæki [Icelandair] sem á þetta hlutafjárútboð eftir og það kemur ekki til ábyrgðar ríkisins nema ströng skilyrði séu uppfyllt.“

Haraldur segir að fjárlaganefnd ætli og verði að vera snör í snúningum hvað frumvarpið varðar enda ekki mikill tími til stefnu. Samkvæmt starfsáætlun þingsins á nefndin að klára sína umsögn í næstu viku.

Kórónuveiran hefur komið illa við flugfélög

Eins og áður hefur verið greint frá ákváðu íslensk stjórnvöld að veita Icelandair Group ríkisábyrgð á lánalínu fyrir um tíu dögum síðan. Fjárhæð lánalínunnar getur orðið allt að 120 milljónir Bandaríkjadala (um 16,5 milljarða króna á núverandi gengi). Ábyrgðin mun nema 90% af lánsfjárhæðinni og er háð samkomulagi aðila um skilmála hennar, samþykki Alþingis og að félagið nái markmiðum sínum um öflun nýs hlutafjár.

Heimsfaraldur kórónuveiru hefur haft mikil áhrif á Icelandair eins og önnur flugfélög enda mun minna um ferðalög fólks á milli landa en áður, t.a.m. vegna ferðatakmarkana sem eru í gildi víðs vegar um heim og er ætlað að hefta útbreiðslu faraldursins.