Verslunarfyrirtækið Arcadia, sem á og rekur Topshop, Burton og Dorothy Perkins, hefur fengið greiðslustöðvun. Óttast er um störf 13 þúsund starfsmanna fyrirtækisins.

Arca­dia Group, sem er í eigu Phil­ip Green, er nú í umsjón Deloitte og verða verslanir keðjunnar áfram opnar. Fram kemur í frétt BBC að kórónuveirufaraldurinn hafi haft alvarleg áhrif á rekstur verslana í eigu Arcadia. Jafnframt verða allar pantanir helgarinnar afgreiddar.

Verslunarveldi Philip Green riðar nú á barmi gjaldþrots en ekki tókst að útvega aukið fé til rekstursins líkt og stefnt var að. Arcadia á 444 verslanir í Bretlandi og 22 erlendis. Alls eru um 9.300 starfsmenn fyrirtækisins í hlutabótaleiðinni vegna Covid-19. 

Philip Green er stjórnarformaður Arcadia. AFP

Ian Grabiner, forstjóri Arcadia, segir í viðtali við BBC að þetta sé sorgardagur fyrir fyrirtækið.

„Áhrif Covid-19-farsóttarinnar, þar á meðal þvinguð lokun verslana í langan tíma, hefur haft alvarleg áhrif á viðskipti allra vörumerkja okkar,“ segir hann.

Hann segir það forgangsverkefni á þessum ögrandi tímum að vernda störf og fjárhagslega stöðu fyrirtækisins í þeirri von, að að farsóttinni lokinni verði hægt að halda áfram.

Frétt BBC