Kia kallar inn 295 þúsund ökutæki

Bílaframleiðandinn Kia mun kalla inn ríflega 295 þúsund ökutæki á næstu dögum. Er ástæðan þar að baki sögð vera eldhætta í vélarrými bifreiðanna. Þetta kemur fram í tilkynningu frá framleiðandanum. 

Undirtegundirnar sem um ræðir eru 2012-2013 árgangar af Sorento, 2012-2015 árgerðir af Forte Koup og Forte, 2011-2013 árgerðir af Optima Hybrid, 2014-2015 árgerðir af Soul og 2012 árgerð Sportage. Talið er að bilun í vélum bifreiðanna geti orðið til þess að það kvikni í vélarrýminu. 

Bifvélavirkjar Kia munu fara yfir vélina og kanna hvort olíuleki geti átt sér stað. Þá verður skipt um vélar í bifreiðum sé talin þörf á því. Vonir eru bundnar við að framangreindar viðgerðir komi í veg fyrir eldhættu. 

Þetta er annað áfallið sem Kia verður fyrir á stuttum tíma. Í síðustu viku var greint frá því að hlutdeildarfélagi þess, Huyndai, hefði verið gert að greiða 210 milljón dala sekt eftir að í ljós kom að illa hafði verið staðið að innköllun 1,6 milljón bifreiða. 

• Blogga um frétt