Viðskipti | mbl | 17.12.2020 | 12:34

Álag á Keflavíkurflugvelli yfir hátíðarnar

Álag getur skapast á keflavíkurflugvelli í aðdraganda jóla og í kringum áramót. mbl.is/Eggert Jóhannesson

Isavia vekur athygli á því að álag getur skapast á Keflavíkurflugvelli í aðdraganda jóla og kringum áramót. Búist er við að fleiri ferðamenn fari þar um en að jafnaði á síðustu vikum og mánuðum.

„Eru farþegar á leið úr landi tiltekna álagsdaga, þ.e. 18. og 19. desember og 2. og 3. janúar, hvattir til að mæta í innritun og öryggisleit 3 klukkustundum fyrir brottför. Það yrði gert til að koma til móts við þær aðstæður sem annars gætu skapast og þannig að afgreiðsla gangi eins vel og kostur er“ segir í tilkynningu frá Isavia.

Auk þess eru farþegar hvattir til þess að gæta vel að almennum sóttvörnum á flugvellinum og eru bæði farþegar og starfsfólk beðnir um að nota grímur á farþegasvæðum í flugstöðinni. Standar með handspritti má finna víða í flugstöðinni. Þá er einnig hægt að kaupa spritt og sóttvarnargrímur í fríhafnarverslun og hjá afgreiðslu Airport Parking.

Farþegum bent á að skrá sig í flug á netinu

Til að hraða ferðalagi og fækka snertingum er farþegum bent á að skrá sig í flug á netinu áður en haldið er á flugvöllinn, sé þess kostur. Einnig er farþegum bent á að nota sjálfsafgreiðslustöðvar í brottfararsal til að innrita sig.

Fram kemur í tilkynningunni að bið kunni að myndast við skimunarbása Heilsugæslu höfuðborgarsvæðisins á flugvellinum. Komi til þess verður hleypt í hópum úr flugvélum inn í flugstöðina til að stýra á álagi.

Þjónusta verslunar- og veitingaaðila í flugstöðinni hefur verið skert síðustu vikur og mánuði vegna færri flugferða sökum Covid-19 faraldursins. Nánari upplýsingar um verslanir og veitingastaði eru að finna á vef Keflavíkurflugvallar.

Almannavarnir vilja beina því til fólks, sem á von á ættingjum og vinum til landsins fyrir og um hátíðarnar, að sækja ekki komufarþega á Keflavíkurflugvöll. Því er beint til farþega að þeir taki rútu, leigubíl eða keyri sjálfir á áfangastað, við komuna til landsins. Nánari upplýsingar um leiðbeiningar Almannavarna og heilbrigðisyfirvalda vegna ferðalaga til og frá Íslandi má finna hér.