Stefna á að velta þremur milljörðum

Alexander G. Edvardsson, framkvæmdastjóri Hringrásar, segir mikla hagræðingu fylgja sameiningu félagsins við HP gáma. Áætlað sé að veltan verði um þrír milljarðar í ár. Sameiningin er enn einn vitnisburðurinn um hraðan vöxt á markaði með sorp og endurvinnslu.

Fjölskyldufyrirtækið Hópsnes á hið sameinaða félag. Á síðari hluta síðasta árs fjárfestu eigendurnir í nýju athafnasvæði við Álhellu í Hafnarfirði, gegnt álverinu í Straumsvík, á ríflega 27 þúsund fermetra lóð og stendur þar til að taka í notkun þúsund fermetra byggingu.

Að sögn Alexanders er fyrirhugað að byggja þar upp aðstöðu til að taka á móti og vinna margvíslegan úrgang sem fellur til hjá einstaklingum og fyrirtækjum. M.a. verði tekinn í notkun tætari sem geti til dæmis tætt í sundur heilu bílflökin, flokkað málmana og þannig aukið verðmæti hráefnisins. Ekki sé áformað að fjölga starfsstöðvum meira, að því er fram kemur í umfjöllun um mál þetta í Morgunblaðinu í dag.