Viðskipti | mbl | 11.2.2021 | 14:38

4,3 milljarða neikvæð áhrif dótturfélaga

Valitor. Ljósmynd/Aðsend

Neikvæð rekstraráhrif dótturfélaganna Valitors, Stakksbergs og Sólbjargs á afkomu samstæðu Arion banka á síðasta ári nema samtals 4,3 milljörðum króna.

Þetta kemur fram í uppgjöri bankans sem var birt í gær.

Frétt af mbl.is

Hagnaður Arion margfaldast milli ára

Þar segir að Valitor hafi á síðasta ári ráðist í umfangsmikla endurkipulagningu og hagræðingaraðgerðir, auk þess sem starfsemin í Danmörku og hluti hennar í Bretlandi hafi verið seld.

Áhrif aðgerðanna hafi skilað nokkrum árangri en rekstrarafkoma Valitors hafði engu að síður neikvæð áhrif á Arion banka sem nam 1,3 milljörðum króna.

„Áfram er Valitor í söluferli en það hefur tekið lengri tíma en upphaflega var gert ráð fyrir, m.a. vegna breyttra markaðsaðstæðna tengdum Covid-19. Þrátt fyrir þessa seinkun finnur bankinn áhuga frá ýmsum aðilum á kaupum á Valitor,“ segir í uppgjörinu en í árslok var bókfært virði Valitors 8,5 milljarðar króna.

1,4 milljarðar vegna Helguvíkur

Neikvæð rekstraráhrif Stakksbergs ehf., sem heldur utan um allar eignir sílikonverksmiðjunnar í Helguvík, námu 1,4 milljörðum króna á árinu 2020 vegna niðurfærslu sílikonverksmiðjunnar. Í lok ársins var bókfært virði Stakksbergs 1,6 milljarðar króna og endurspeglar það einkum verðmæti lóðar og endursöluvirði tækjabúnaðar.

Kísilverksmiðjan í Helguvík. mbl.is/Eggert Jóhannesson

Einingar seldar út úr rekstrinum

Sólbjarg ehf. heldur utan um eignarhluti Arion banka í ferðaskrifstofum á Norðurlöndum og á Íslandi sem áður heyrðu undir TravelCo.

„Unnið hefur verið að endurskipulagningu rekstrarins á árinu en ferðaþjónustuiðnaðurinn hefur beðið mikla hnekki vegna heimsfaraldursins. Í tengslum við endurskipulagninguna hafa verið seldar einingar út úr rekstrinum, bæði hér heima og erlendis,“ segir í uppgjörinu.