Hagnaður Eikar dregst saman

Fasteignafélagið Eik hagnaðist um 720 milljónir króna eftir skatt á síðasta ári. Er það töluvert minna en árið áður þegar hagnaður nam tæpum þremur milljörðum króna. Þetta kemur fram í óendurskoðuðu stjórnendauppgjöri félagsins fyrir liðið ár.

Leigutekjur félagsins námu tæpum 7,6 milljörðum króna og jukust um 2,3% frá fyrra ári. Þá voru aðrar tekjur 783 milljónir króna.

Fasteignafélagið á yfir 100 fasteignir með rúmlega 312 þúsund fermetra til útleigu. Er heildarvirði þeirra um 100,3 milljarðar króna og fjöldi leigutaka yfir 400. Meðal helstu eigna eru Turninn í Kópavogi, Nýi-Glæsibær, Glerártorg á Akureyri, Borgartún 21 og 21a, Suðurlandsbraut 8 (þar sem Sýn og Vodafone eru til húsa) og Pósthússtræti 2 (Hótel 1919).

Langstærstu útgjaldaliðir félagsins voru fasteignagjöld, tryggingar og vatns- og fráveitugjöld, sem samanlagt námu 1.315 milljónum króna. Þá nam virðisrýrnun viðskiptakrafna 421 milljón króna.

• Blogga um frétt