„Blekkti kröfuhafa“ og þáði 170 milljónir

Sveinn Andri Sveinsson, skipta­stjóri þrotabús EK 1923, þáði þóknun upp á 170 milljónir króna með virðisaukaskatti fyrir rekstur dómsmála sem mörg hver voru gegn fyrri eig­anda EK1923, at­hafn­amann­in­um Skúla Gunn­ari Sig­fús­syni, jafn­an kennd­um við Su­bway.

Þetta segir Heiðar Ásberg Atlason, lögmaður Skúla.

Eft­ir að bú EK1923 var tekið til gjaldþrota­skipta fór Sveinn í sam­tals sjö mál, en þau hafa mörg verið fyr­ir­ferðarmik­il í fjöl­miðlum und­an­far­in ár. Stærsta málið var gegn Sjöstjörnunni, félagi Skúla. Skúli vann málið í Landsrétti, en því var síðar snúið í Hæstarétti og var honum því gert að greiða um hálfan milljarð króna. 

Frétt af mbl.is

Máli gegn þrotabúi EK1923 vísað frá dómi

Nokkrir kröfuhafar þrotabúsins hafa gert athugasemd um hvernig staðið hefur verið að málum EK1923. Einhverjir höfðu jafnframt bent á þóknun skiptastjóra en hún þætti í hærra lagi. Dómari hafði jafnframt skipað Sveini Andra að endurgreiða þóknun sem hann hafði áður greitt sér og sagt að hana ætti að ákveða á skiptafundi. 

Blekkti kröfuhafa

Aðspurður segir Heiðar skiptastjórann hafa beitt bellibrögðum til að ná sínu fram á skiptafundi. „Sveinn Andri dulbjó auglýsingu í Lögbirtingarblaðið þannig að nafn þrotabúsins kom ekki fram og því bárust engar upplýsingar til lögmanna úr vöktun sem notuð er til að fá allar upplýsingar tengdar því félagi í Lögbirtingarblaðinu,“ segir Heiðar og heldur áfram:

„Það er enginn annar aðili sem beitir svona brögðum, alls staðar kemur fram nafn viðkomandi þrotabús nema hjá honum. Hann vísvitandi blekkti kröfuhafa til að þeir kröfuhafar sem höfðu athugasemdir við þóknun myndu ekki mæta. Til að kóróna þetta þá boðaði hann sérstaklega þá kröfuhafa sem hann vildi fá á skiptafundinn og samþykktu þóknun hans á meðan hann svaraði ekki öðrum.”

Eins og fyrr segir var samþykkt að greiða lögmanninum 170 milljónir króna með virðisaukaskatti. Sjálfur hefur Sveinn Andri sagt að gjaldþrota­skiptameðferðin hafi verið sú „ár­ang­urs­rík­asta í sögu ís­lensks gjaldþrota­rétt­ar“.

Frétt af mbl.is

Skiptum EK1923 lokið eftir sjö dómsmál

• Blogga um frétt