Takmarkanir gjörbreyttu rekstrinum

„Þetta verður fimmtándi markaðurinn sem við í POP-mörkuðum stöndum fyrir á þremur árum. Við höfum annaðhvort verið með markaði þar sem fyrirtæki stilla upp bás yfir heila helgi og bjóða sínum viðskiptavinum að koma eða netmarkaði,“ segir  Eyrún Anna Tryggva­dótt­ir, einn eig­enda POP-markaða.

Frétt af mbl.is

Brjálað að gera strax á miðnætti

Um næstu helgi fer fram heima-pop-up á vefnum heimapopup.is. Nú taka um 200 verslanir þátt í verkefninu en markaðirnir hafa vaxið og dafnað undanfarin ár. Það má síðan í raun segja að þeir hafi sprungið almennilega út í kjölfar heimsfaraldurs kórónuveiru. 

Yfirlitssíða fyrir viðskiptavini

„Eftir að samkomutakmarkanir voru settar á fyrir rúmlega ári höfum við fært markaðinn nánast alfarið á netið. Það er ótrúlega magnað að sjá hvað þessi vettvangur að mæta með sína netverslun eða verslun á „markað“ hefur vaxið síðustu þrjú ár. Við erum með fyrirtæki sem hafa fylgt okkur frá fyrsta markaðnum sem var lítill markaður í Síðumúlanum.“

Á vefn­um er hægt að nálg­ast til­boð fjölda versl­ana. Er síðan því eins kon­ar yf­ir­lits­síða. Segir Eyrún að markaður sem þessi muni einungis halda áfram að vaxa. „Þetta er þægileg og einföld leið til að láta vita af sér. Fyrirtæki sjá hag í því að vera með sitt vörumerki þar sem bæði keppinautar og önnur fyrirtæki eru að auglýsa sig.“

• Blogga um frétt