Greiða atkvæði gegn starfskjarastefnu Arion

Gildi-lífeyrissjóður mun gera athugasemd við og greiða atkvæði gegn tillögu stjórnar Arion banka um starfskjarastefnastefnu sem verður lögð fram á aðalfundi Arion banka næsta þriðjudag. Þetta segir í tilkynningu frá Gildi.

Í bókun sem Gildi mun leggja fram á fundinum segir meðal annars:

„Stjórn bankans hefur ekki með fullnægjandi hætti rökstutt þörfina og tilgang þess að nýta heimild til þess að koma á fót árangurstengdu launakerfi, aukningu kauprétta og áskriftarréttindum.

Laun stjórnenda bankans virðast að mati sjóðsins, þegar tillit er tekið til möguleika á árangurstengdum greiðslum, kaupréttum og áskriftarréttindum, hærri en það sem gengur og gerist hjá öðrum íslenskum bönkum og skráðum fyrirtækjum sem starfa á íslenskum markaði.“

Þá mun Gildi greiða atkvæði gegn tillögu um þóknun til stjórnarmanna á þeim grundvelli að fjárhæðir sem þar eru lagðar til séu hærri en það sem gengur og gerist. Auk þess mun Gildi greiða atkvæði gegn tillögu um nýjar starfsreglur tilnefningarnefndar.

• Blogga um frétt