Fractal tryggir þriggja milljóna dollara fjármögnun

Íslenska hugbúnaðarfyrirtækið Fractal 5 hefur sótt þriggja milljóna dollara fjármögnun til bandaríska fjárfestingarsjóðsins Menlo Ventures sem kemur inn í hluthafahóp fyrirtækisins.

Fractal 5 vinnur að þróun hugbúnaðar á sviði samskiptatækni. Forstjóri og stofnandi fyrirtækisins er Guðmundur Hafsteinsson. Hann býr að langri starfsreynslu í tæknigeiranum og starfaði m.a. í Bandaríkjunum í hálfan annan áratug. Síðast var hann yfirmaður vöruþróunar hjá Google. Þar á undan leiddi hann þróunarvinnu hjá ýmsum fyrirtækjum, m.a. Apple auk fyrirtækja sem hann kom sjálfur að stofnun á.

Meðstofnandi Guðmundar að fyrirtækinu er Björgvin Guðmundsson sem á að baki langa reynslu í íslenskum fjölmiðlum, síðast sem ritstjóri Viðskiptablaðsins. Síðustu ár hefur Björgvin verið í hópi eigenda KOM ráðgjafar.

Fractal 5 var stofnað í fyrra og hjá því starfa nú fjórir starfsmenn. Segir í tilkynningu frá fyrirtækinu að sennilega muni starfsfólki fjölga á næstunni eftir því sem vöruþróun þess vindur fram og verkefnum fjölgar.

Innan skamms mun frumútgáfa Fractal 5 fara í prófanir en hún felur í sér tækni til að auðvelda fólki að eiga í samskiptum við einstaklinga og hópa sem það vill rækta samband sitt við.

Ásamt Guðmundi og Björgvin starfa þau Sara Björk Másdóttir og Kristján Ingi Michaelsson hjá fyrirtækinu.

• Blogga um frétt