Icelandair tapaði 4 milljörðum á fyrsta fjórðungi

Tekur Icelandair námu 7,3 milljörðum króna á fyrsta ársfjórðungi ársins 2021 og voru 73% lægri en á fyrsta ársfjórðungi í fyrra.

Tap félagsins er þó mun minna en á fyrsta ársfjórðungi ársins 2020, en það nam 3,9 milljörðum króna samanborið við 30,8 milljarða króna á fyrsta ársfjórðungi í fyrra. Þetta kemur fram í uppgjöri félagsins fyrir fyrsta ársfjórðung.

Sætaframboð félagsins dróst saman um 92% milli ára. Vegna gríðarlegrar óvissu um þróun kórónuveirufaraldursins mun félagið ekki gefa út afkomuspá fyrir árið 2021, en gert er ráð fyrir að flug fari að aukast á ný frá og með yfirstandandi ársfjórðungi.

Þrátt fyrir mikinn samdrátt í farþegaflugi, jukust tekjur af fraktstarfsemi um 64% milli ára og flutt frakt var umfram það magn sem flutt var fyrir faraldurinn. Eiginfjárhlutfall félagsins, leiðrétt fyrir tímabundnum áhrifum áskriftarréttinda, var 23% samanborið við 25% í byrjun árs.

Lausafjárstaða félagsins nemur 35,8 milljörðum króna, en þar af er handbært fé og lausafjársjóðir að fjárhæð 14 milljarða króna.

Í mars lauk samþættingu Air Iceland Connect (áður Flugfélags Íslands) og Icelandair en áætlað er að hún feli í sér 381 milljónar króna kostnaðarhagræðingu á ári hverju ásamt auknum tekjumöguleikum í gegnum sameinað vörumerki, dreifikerfi og leiðakerfi.

Ásættanlegt í ljósi aðstæðna

Bogi Nils Bogason, forstjóri Icelandair, segir rekstrarniðurstöðuna ásættanlega þegar tekið er tillit til áhrifa faraldursins. Áhersla á markvissa leiðakerfisstýringu og öflugt kostnaðaraðhald, ásamt góðum árangri í fraktflutningum hafi skilað því.

„Þá sjáum við jákvæð teikn um aukið umfang í innanlandsfluginu en samþætting þess og alþjóðaflugsins mun stuðla að sterkara og skilvirkara flugfélagi og betri þjónustu við farþega,“ er haft eftir honum í tilkynningu.

Bogi Nils Bogason, forstjóri Icelandair. mbl.is/Arnþór

Þá segir Bogi að framvinda bólusetninga, sérstaklega á mörkuðum eins og í Bandaríkjunum, og möguleg aflétting ferðatakmarkana í Evrópu fyrir bólusetta ferðamenn fela í sér jákvæð skref.

Bogi segir mikil tækifæri fyrir Ísland og íslenska ferðaþjónustu þegar markaðir opna á ný og bendir á að eldgosið á Reykjanesskaga hafi vakið enn meiri athygli á Íslandi sem áfangastað. „Við erum tilbúin að auka flugið um leið og ástandið í heiminum batnar en sveigjanleiki leiðakerfis Icelandair og öflugir innviðir félagsins gera okkur kleift að bregðast hratt við breytingum á mörkuðum,“ segir hann.

• 1 blogg um fréttina

Bloggað um fréttina

• Jónatan Karlsson: Hverjar eru framtíðarhorfur Icelandair?