Magnús selur fyrir 48,5 milljónir í Festi

Magnús Júlíusson, deildarstjóri orkusviðs N1 og annar stofnandi Íslenskrar orkumiðlunar, sem seld var til N1 fyrir rúmlega ári, hefur selt hlutabréf í Festi, móðurfélagi N1, fyrir 48,5 milljónir króna. Samtals er um að ræða 250 þúsund hluti á genginu 194. Það var félagið Betelgás ehf., sem er að fullu í eigu Magnúsar, sem átti bréfin, en við sölu Íslenskrar orkumiðlunar í fyrra var meðal annars greitt með hlutabréfum í Festi.

Samkvæmt tilkynningu til Kauphallarinnar vegna viðskipta fruminnherja kemur fram að enn séu 685.861 hlutir, að verðmæti 133 milljónir, í eigu fjárhagslega tengdra aðila Magnúsar.

Íslensk orkumiðlun var stofnuð af Magnúsi og Bjarna Ármannssyni, en auk þeirra áttu Ísfélag Vestmannaeyja, Kaupfélag Skagfirðinga og Festi stóran hlut í félaginu. Í mars í fyrra var svo tilkynnt um að Festi hefði keypt öll bréf félagsins og var það þá verðmetið á 850 milljónir í heild. Seljendur skuldbundu sig til að selja ekki hluti sína í 12 mánuði frá afhendingu.

Við kaupin færðist Íslensk orkumiðlun undir N1, sem er orkusali Festar.

• Blogga um frétt