Eimskip viðurkennir alvarleg brot
Setja bókamerki
Samkeppniseftirlitið og Eimskip undirrituðu í dag sátt vegna rannsóknar á ætluðum brotum Eimskips og Samskipa á árunum 2008-2013. Með undirritun sáttarinnar er rannsókn Samkeppniseftirlitsins á Eimskip lokið. Þetta kemur fram í tilkynningu frá Samkeppniseftirlitinu.
Sáttin felur það í sér að Eimskip viðurkenni alvarleg brot á samkeppnislögum vegna víðtæks samráðs við keppinautinn Samskip, sem fólst einna helst í samráði um breytingar á siglingakerfum, takmörkun á flutningsgetu, samráði um álagningu gjalda og afsláttarkjara, samráði um sjóflutninga beggja vegna Atlantshafsins og loks samráði um landflutningaþjónustu á Íslandi. Þá er Eimskip gert að greiða 1,5 milljarða í stjórnvaldssekt sem rennur í ríkissjóð sem og að skuldbinda sig til þess að grípa til aðgerða sem vinna gegn því að brot endurtaki sig.
Með undirritun sáttarinnar er rannsókn Samkeppniseftirlitsins á Eimskip lokið. Ætluð brot Samskipa eru hins vegar enn til rannsóknar hjá Samkeppniseftirlitinu.
Ætluð brot til rannsóknar í rúman áratug
Samkeppniseftirlitið hefur haft ætluð brot Eimskips og Samskipa hf. (og tengdra félaga) gegn 10. gr. samkeppnislaga og 53. gr. EES-samningsins til rannsóknar í rúm ellefu ár eða frá því eftirlitinu barst fyrst ábendingar frá bæði viðskiptavinum og keppinautum fyrirtækjanna. Rannsóknin hófst með húsleit hjá fyrirtækjunum í september 2013 en önnur húsleit var svo framkvæmd í júní 2014. Rannsóknin tekur til háttsemi fyrirtækjanna á mörkuðum fyrir sjóflutninga, landflutninga, flutningsmiðlun og tengdrar þjónustu. Megin rannsóknartímabilið eru árin 2008 – 2013.
Eimskip höfðaði einkamál gegn Samkeppniseftirlitinu
Árið 2019 höfðaði stjórn Eimskips almennt einkamál gegn Samkeppniseftirlitinu þar sem þess var krafist að rannsókn stofnunarinnar, sem þá hafði staðið yfir í um tíu ár, yrði dæmd ólögmæt og henni hætt.
Eimskip hafði áður lagt fram kröfu af sama meiði á grunni ákvæða laga um meðferð sakamála, en dómstólar féllust ekki á að unnt væri að reka málið gegn Samkeppniseftirlitinu á þeim lagagrundvelli. Í þeirri kröfu reisti Eimskip kröfur sínar m.a. á því að rannsóknin byggði á ólögmætri haldlagningu gagna og að brotið hafi verið gegn hlutlægnisskyldu Samkeppniseftirlitsins og réttindum Eimskips við rannsóknina.
Umfang rannsóknarinnar er án fordæma við rannsókn samkeppnismála hér á landi og hefur rannsóknin sætt forgangi hjá Samkeppniseftirlitinu frá byrjun, segir í tilkynningu frá eftirlitinu.
Hvað gerðist eiginlega í VMA?
Úlfar: Heppileg tímasetning á gosinu
Mjög alvarlegt ef Njarðvíkuræð gefur sig
Maskína: Framsókn í fallbaráttu
Beint: Eldgos hafið við Stóra-Skógfell
Búseta skortir byggingarlóðir
Hraunið náð Njarðvíkuræð: Fylgjast með raflínu
Virknin dregist saman um 600 metra