Selja Minka fyrir hálfan milljarð

Útlit er fyrir að tekjur fyrirtækisins Mink Campers, sem framleiðir og selur samnefnd sporthýsi, muni fara vel yfir hálfan milljarð króna á þessu ári. Nú þegar hafa selst um eitt hundrað sporthýsi á árinu. Vonir standa til að góð sala verði í haust, en alla jafna seljast um 50% allra sporthýsa á haustin þegar fólk tryggir sér hús fyrir komandi sumar.

Mink Campers er skráð á eistneska fjármögnunar- og markaðstorginu Funderbeam, þar sem viðskipti með félagið fara fram. Hefur gengi þess hækkað þar um tæplega 13% frá því í apríl síðastliðnum og 33% frá því félagið var fyrst skráð á Funderbeam. Gengið er nú 3,5 evrur á hlut. Markaðsvirði Mink Campers á Funderbeam er í dag tæpur milljarður króna.

Örn Ingvi Jónsson framkvæmdastjóri fyrirtækisins segir að félagið sé vel fjármagnað og tilbúið að vaxa frekar. Á dögunum kom inn langtímalánsfjármagn frá fjárfestingarsjóðnum MF2 hs. sem er í eigu sjóðastýringarfyrirtækisins Ísafold Capital Partners. Síðastliðinn vetur bættist við nokkur fjöldi hluthafa í gegnum fjármögnunarlotu á Funderbeam. Stærsti eigandi Mink Campers er fjárfestingarfélagið Eldhrímnir, fjölskyldufyrirtæki Ingimundar Sveinssonar arkitekts og fjölskyldu, með 23% hlut.

Að sögn Arnar stefnir félagið á 10 milljóna evra veltu á næsta ári og tuttugu milljóna evra veltu árið 2024.

Í september verður Mink Campers í fyrsta skipti með bás á hjólhýsasýningunni Caravan Saloon í Düsseldorf í Þýskalandi sem verða mikil tímamót fyrir sporthýsafyrirtækið.

Örn Ingvi segir að vagnarnir seljist víða í Evrópu en einnig séu farnar að koma inn pantanir frá Suður-Kóreu. Aukin markaðshlutdeild í þeim heimshluta sé afar hagfelld en með því sé hægt að jafna söluna yfir árið vegna mismunandi árstíðaskipta á milli heimsálfanna.

Lestu ítarlegri umfjöllun í ViðskiptaMogganum í dag.