Lucinity vaxtarsproti ársins

Upplýsingatæknifyrirtækið Lucinity, sem framleiðir gervigreindarhugbúnað sem hjálpar fyrirtækjum að berjast gegn peningaþvætti, var valið vaxtarsproti ársins (e. Nordic Scaleup of the Year) á fjártækniviku Kaupmannahafnar (CPH Fintech Week) í síðustu viku.

Fjártæknivikan er haldin á ári hverju af CPH Fintech sem er að sögn Guðmundar Kristjánssonar, framkvæmdastjóra Lucinity, einn sterkasti nýsköpunarklasi Norðurlanda.

Lucinity atti kappi við tíu önnur norræn sprotafyrirtæki, en þrjú voru valin úr hópnum til að kynna starfsemi sína nánar fyrir dómnefnd.

„Það sem var hvað merkilegast við þessa verðlaunahátíð var dómnefndin. Hún var skipuð fulltrúum frá Citibank, eins stærsta banka í heimi, endurskoðunarfyrirtækinu Ernst & Young, Klarna, eins stærsta fjártæknisprota Norðurlanda, og Lunar, stærsta nýja bankans á Norðurlöndum,“ segir Guðmundur.

Aukinn trúverðugleiki

Spurður um þýðingu verðlaunanna segir Guðmundur þau mikilvæg upp á aukinn trúverðugleika á markaðnum. „Einnig skipta þau máli til að sýna fjárfestum Lucinity að mögulegir kaupendur að okkar vörum og þjónustu séu spenntir fyrir því sem við erum að gera.“