Fríhöfnin má kalla sig fríhöfn fullum fetum

Fríhöfnin í Keflavík má notast við hugtökin „Duty Free“ og „Fríhöfn“ í markaðssetningu sinni.

Þetta er niðurstaða Neytendastofu en stofnuninni barst fyrr á þessu ári kvörtun frá fyrirtækjunum Sante ehf. og ST ehf. þar sem því var haldið fram að hugtökin væru villandi enda væru verslanir Fríhafnarinnar ekki alfarið undanþegnar áfengis- og tóbaksgjaldi.

Neytendastofa hefur komist að þeirri niðurstöðu að hugtakanotkunin haldi, enda sé áfengis- og tóbaksgjald ekki tollur og þar með væru verslanirnar tollfrjálsar verslanir í þeim skilningi orðsins.