8,2 milljarða hagnaður Arion banka

Hagnaður Arion banka á þriðja fjórðungi þessa árs nam 8.238 milljónum króna. Arðsemi eiginfjár var 17% samanborið við 8,3% á þriðja fjórðungi í fyrra. Heildareignir bankans jukust um 14,8% frá áramótum. Arðgreiðslur og endurkaup á hlutbréfum bankans námu 25,5 milljörðum króna á fyrstu níu mánuðum.

Þetta kemur fram í tilkynningu frá bankanum.

Hreinn vaxtamunur var 2,7% í lágu vaxtaumhverfi, samanborið við 2,9% á þriðja ársfjórðungi í fyrra. Þriðji ársfjórðungurinn er sá besti hvað hreinar þóknanatekjur varðar frá árinu 2016. Aukningin er um 36% frá þriðja fjórðungi í fyrra.

Tekjur af kjarnastarfsemi jukust um 7,5% samanborið við á sama tíma í fyrra. Kostnaðarhlutfallið á fjórðungnum var 37,5%, samanborið við 40,2% á sama fjórðungi í fyrra.

Arion banki gaf út sértryggð skuldabréf að upphæð 300 milljónir evra í september en um var að ræða fyrstu sértryggðu skuldabréfaútgáfu íslensks banka í evrum.

Benedikt Gíslason, bankastjóri Arion banka. Ljósmynd/Aðsend

Eiginfjárhlutfall bankans (CAR hlutfall) var 25,4% í lok júní og hlutfall almenns eiginfjárþáttar 1 var 20,9% að teknu tilliti til væntrar arðgreiðslu, sem nemur 50% af hagnaði í samræmi við arðgreiðslustefnu bankans, og fyrirhugaðra endurkaupa eigin bréfa að fjárhæð 10 milljarða króna, samanborið við 27,0% og 22,3% um áramót, að því er segir í tilkynningunni.

Heildareignir námu 1.346 milljörðum króna í lok september, samanborið við 1.173 milljarða króna í árslok 2020. Lán til viðskiptavina jukust um 9,0% frá áramótum en íbúðalán hækkuðu um 16,4% á sama tíma. Lausafé jókst um 15,3% þrátt fyrir endurkaup á hlutabréfum bankans og arðgreiðslu. Á skuldahliðinni jukust innlán um 12,8% fyrstu níu mánuði ársins og lántaka jókst um 32,8%, mest á þriðja ársfjórðungi þegar bankinn gaf út græn skuldabréf og sértryggð skuldabréf í evrum. Heildar eigið fé nam 195 milljörðum króna í lok tímabilsins og kom afkoma tímabilsins til hækkunar. Til lækkunar komu arðgreiðslur og endurkaup á hlutabréfum bankans.

Jákvæð þróun 

„Starfsemi Arion banka gekk vel á þriðja ársfjórðungi eins og hún hefur raunar gert allt þetta ár. Allir helstu fjárhagsmælikvarðar bankans þróast með jákvæðum hætti á tímabilinu og tekjur af kjarnastarfsemi aukast um 7,5% frá sama tímabili fyrir ári. Þóknanatekjur bankans halda áfram að aukast og bera fjölbreyttri starfsemi bankans vott. Í takt við jákvæða þróun í efnahagslífi landsins aukast útlán Arion banka um 6% á fjórðungnum. Eiginfjár- og lausafjárhlutföll bankans eru áfram sterk og með því hæsta sem gerist í Evrópu,“ segir Benedikt Gíslason, bankastjóri Arion banka, í tilkynningunni.

„Arion banki gaf nýverið út sértryggð skuldabréf í evrum sem er nýjung í fjármögnun bankans og opnar aðgengi að nýjum hópi fjárfesta. Útgáfunni var afar vel tekið og vakti þó nokkra eftirtekt á alþjóðlegum lánsfjármörkuðum. Kjörin voru þau hagstæðustu sem íslenskur útgefandi, að íslenska ríkinu meðtöldu, hefur fengið á alþjóðlegum lánsfjármörkuðum á síðustu 13 árum og er mikilvæg viðbót við fjármögnunarkosti bankans til framtíðar," segir Benedikt.

• Blogga um frétt