Netbókhald kaupir Notando

Netbókhald ehf. hefur gengið frá kaupum á rekstri bókhalds- og hugbúnaðarfyrirtækisins Notando á Íslandi ehf., að því er kemur fram í tilkynningu.

„Með kaupunum styrkir Netbókhald stöðu sína á markaði með auknu þjónustuframboði og tvenns konar notendavænu viðmóti. Bæði fyrirtækin hafa boðið upp á ódýrar og auðveldar bókhaldslausnir fyrir minni og miðlungsstór fyrirtæki,“ segir í tilkynningunni.

Þá kemur fram að Netbókhald ehf. stefni á að reka bæði kerfin samhliða en jafnframt bjóða viðskiptavinum í Notando kerfinu að færa sig á auðveldan hátt í nýja lausn Netbókhalds, allt eftir óskum þeirra.

„Markmið okkar hjá Netbókhaldi er að stækka hratt og örugglega á næstu árum með nýuppfærðum hugbúnaði í bestu gæðum sem nútímatækni hefur uppá að bjóða. Tækifæri okkar felast í að hlusta á viðskiptavini okkar, skilja þeirra áskoranir og bjóða lausnir sem hjálpa þeim að ná árangri,“ er haft eftir Elvari Níelssyni, framkvæmdastjóra Netbókhalds, í tilkynningunni.

Samtals 33 ára reynsla

Netbókhald ehf. hefur verið í rekstri í yfir 18 ár og selur sambærileg kerfi og Notando. En Notando hefur á síðustu 15 árum boðið upp á sölukerfi, fjárhagskerfi og launakerfi ásamt fjölmörgum smærri kerfum fyrir millistór og smærri fyrirtæki.

Segir í tilkynningunni að Netbókhald ehf. hafi tekið miklum stakkaskiptum á síðustu þremur árum þar sem allir innviðir fyrirtækisins hafa verið endurnýjaðir og nýtt viðmót útbúið til handa viðskiptavinum. Í kerfum félagsins hafa verið útbúnir 2 milljónir reikninga, 200 þúsund launaseðlar og yfir 430 milljarða velta farið í gegnum hugbúnaðinn. Þá segir að núverandi viðskiptavinir beri mikið traust til kerfisins og að þeir séu ánægðir með einfaldleikann í bókhaldsgerð

Ingvar Guðmundsson framkvæmdastjóri Notando tekur undir ánægju Elvars með viðskiptin og að Netbókhald skuli taka við þessu mikilvæga kefli. „Vegna mikilla anna í öðrum verkefnum og vegna fjarveru frá Íslandi hefur þjónustan undanfarin ár farið hallandi fæti og hugbúnaðurinn ekki uppfærður sem skyldi. Ég hef fulla trú á að Netbókhald muni vinna vel með viðskiptavinum okkar sem munu fá aðgang að nýuppfærðu og mun betra kerfi,“ er haft eftir Ingvari.  

• Blogga um frétt