Valitor hagnast í fyrsta sinn frá 2017

Heildarafkoma Valitor nam um 353 milljónum króna á árinu 2021, samanborið við heildartap upp á um einn milljarð króna árið áður. Viðsnúningurinn á milli ára er því um 1,4 milljarðar króna. Þetta kemur fram í tilkynningu frá félaginu. 

Þar segir einnig að niðurstaðan sé í samræmi við væntingar stjórnenda en þetta er í fyrsta sinn frá árinu 2017 sem Valitor skilar hagnaði á ársgrundvelli, samkvæmt tilkynningunni.

Einnig segir að unnið hafi verið markvisst að því að hagræða og einfalda rekstur félagsins á liðnum árum, samþætta grunnkerfi og auka skilvirkni.

Heildartekjur 14,3 milljarðar

Heildartekjur félagsins námu um 14,3 milljörðum króna og jukust um 2,5% á milli ára. Heildarrekstrarkostnaður félagsins dróst saman um tæplega 1,2 milljarða á milli ára. Launakostnaður dróst saman um 350 milljónir króna og annar rekstrarkostnaður ásamt afskriftum lækkaði um 850 milljónir króna.

Í tilkynningunni segir að Valitor sé skuldlaust félag og eigið fé hafi numið 7,7 milljörðum króna í lok árs. „Valitor mun halda áfram að leggja áherslu á skilvirkni í rekstri ásamt því að byggja upp sterk viðskiptasambönd við viðskiptavini og samstarfsaðila,“ segir í tilkynningunni. 

Arion banki, eigandi Valitor, samdi um sölu á Valitor til fjártæknifélagsins Rapyd 1. júlí 2021, en salan bíður samþykkis frá Fjármálaeftirlitinu og Samkeppniseftirlitinu.

Herdís Dröfn Fjeldsted, forstjóri Valitor. mbl.is/Árni Sæberg

Hagræðingaraðgerðir skila sér 

Herdís Dröfn Fjeldsted, forstjóri Valitor, segir í tilkynningunni að ánægjulegt sé að sjá árangur af þeim hagræðingaraðgerðum sem félagið hafi þurft að ráðast í á liðnum árum og séu að skila sér í bættri afkomu Valitor. „Þær aðgerðir hafa tekið á bæði stjórnendur og starfsmenn á sama tíma og félagið hefur tekist á við þau áhrif sem kórónuveiru-faraldurinn hefur haft á reksturinn. Framundan eru áskoranir sem meðal annars fela í sér auknar varnir, uppfærslu á tæknibúnaði og frekari vöxt samhliða bættu vöruframboði. Með bættum rekstri erum við betur í stakk búin til að takast á við þær áskoranir og við horfum til ársins 2022 full tilhlökkunar með okkar öfluga starfsfólki,“ segir Herdís. 

• Blogga um frétt