Landsvirkjun greiðir 15 milljarða í arð

Hagnaður Landsvirkjunar á síðasta ári nam 148,6 milljónum dala, jafnvirði 19,3 milljarða króna, og tæplega tvöfaldaðist á milli ára. Stjórn fyrirtækisins áformar að leggja til við aðalfund að 15 milljarðar króna verði greiddir í arð í ríkissjóð vegna síðasta árs.

„Eftir óvissu og erfiðleika í rekstrarumhverfi fyrirtækisins í byrjun veirufaraldursins á árinu 2020 varð mjög jákvæð þróun á rekstri Landsvirkjunar á árinu 2021. Hagnaður fyrir óinnleysta fjármagnsliði, sem er sá mælikvarði sem við lítum helst til þegar afkoma fyrirtækisins er skoðuð, var 29,5 milljarðar króna og hækkaði um 64% á milli ára í Bandaríkjadal talið. Rekstrartekjur Landsvirkjunar jukust um rúm 23% frá fyrra ári og voru meiri en áður í sögu félagsins," er haft eftir Herði Arnarsyni í tilkynningu. 

Segir hann að bætta afkomu megi rekja til mikils bata í rekstrarumhverfi stórnotenda, viðskiptavina,  og Landsvirkjunar sjálfrar. Þegar leið á síðasta ár hafi  raforkukerfið á Íslandi verið fulllestað og eftirspurn mikil frá fjölbreyttum viðskiptavinum.

Tilkynning Landsvirkjunar

• Blogga um frétt