Viðskipti | mbl | 22.2.2022 | 9:43

Stefna með Porsche á markað

Porsche Taycan er nýjasta afurðin úr smiðju fyrirtækisins. 100% rafmagnaður ofursportbíll. Ljósmynd/Porsche

Þýski bílaframleiðandinn Volkswagen hefur staðfest að fyrirtækið skoðar nú möguleika á því að skrá lúxusbílaframleiðandann Porsche á markað í tengslum við frumútboð með hluti í fyrirtækinu.

Forsvarsmenn fyrirtækisins eru í viðræðum við stærsta hluthafa sinn, Porsche SE, um möguleikann á útboði og skráningu. Þetta kemur fram í yfirlýsingu sem fyrirtækið sendi frá sér nú í morgun.

Porsche varð hluti af Volkswagen samstæðunni árið 2012 í öfugum samruna í kjölfar þess að Porsche mistókst að ná yfirráðum í Volkswagen.

Financial Times rifjar upp í ljósi tíðinda dagsins að þrýstingur hafi farið vaxandi á Volkswagen að losa um hlut sinn í fyrirtækinu til þess að greiða fyrir þeirri miklu fjármögnun sem fyrirtækið stendur frammi fyrir að leggja út í vegna rafvæðingar framleiðslu sinnar.

Allt að 28 þúsund milljarða virði

Í dag er markaðsvirði Porsche metið á um 110 milljarða evra, ríflega 15.600 milljarða króna. Hins vegar hefur verið bent á að ef sömu margfaldarar yrðu notaðir á virði fyrirtækisins og gert er með samkeppnisaðila þess, fyrirtæki á borð við Ferrari, gæti markaðsvirðið verið nær 200 milljörðum evra, eða 28.400 milljarðar króna.

Bílabúð Benna er með umboðið fyrir Porsche á Íslandi.