Verðlækkanir á eldsneyti í kortunum

„Líklegt er að verðlækkanir séu í kortunum [hér á landi] miðað við stöðuna sem er núna,“ segir Runólfur Ólafsson framkvæmdastjóri Félags íslenskra bifreiðaeigenda í samtali við mbl.is um lækkanir á heimsmarkaðsverði olíu síðustu daga.

Töluverðar sveiflur hafa verið á heimsmarkaðsverði upp á síðkastið en hækkanir ollu því að lítrinn af bensíni og díselolíu náðu yfir 300 krónum hér á landi þann níunda mars.

Frétt af mbl.is

Bensín og díselolía yfir 300 króna múrinn

Síðan þá hefur heimsmarkaðsverð lækkað en eldsneytisverð á Íslandi hefur ekki fylgt eftir nema að litlu leyti, en besínlítrinn stendur rétt undir 300 krónunum.

„Hrár bensínlítri á heimsmarkaði kostar um 110 krónur á Norður-Evrópu markaði. Í desember var meðalverðið í kringum 85 krónur,“ segir Runólfur og bætir við að hæst hafi lítrinn farið í 123 krónur og er hann því sögulega mjög hár, þrátt fyrir lækkanir.

Hvetur stjórnvöld að lækka skatta

Runólfur segir FÍB búið að senda stjórnvöldum erindi þar sem hvatt er til þess að lækka skatta á olíu.

í Danmörku er til umræðu að auka við úrræði þar sem skattgreiðendur sem þurfa að keyra meira en 22 kílómetra í og úr vinnu geti notað eldsneytistkaup sín til skattafrádráttar.

Þá var í Svíþjóð nýlega tilkynnt að þar yrðu tímabundið lækkaðir skattar á eldsneyti til að sporna við hækkunum heimsmarkaðsverðs olíu.

• Blogga um frétt