Ásgeir segir skilið við Icelandair og heldur til Kaptio

Ásgeir Einarsson hefur verið ráðinn sem þróunarstjóri hjá hugbúnaðarfyrirtækinu Kaptio. Ásgeir starfaði fyrir það sem hugbúnaðararkitekt og teymisstjóri fyrir Icelandair í um sex ár.  

Verkefni Ásgeirs hjá fyrirtækinu verður að leiða áframhaldandi þróun á vöruframboði fyrir  viðskiptavini fyrirtækisins. Ásgeir er nýlega útskrifaður með meistaragráðu í upplýsingastjórnun frá Háskólanum í Reykjavík en hann er einnig með BS-gráðu í tölvunarfræði.

Um fimmtíu starfsmenn

Að sögn Viðars Svanssonar, framkvæmdastjóra Kaptio, er það mikill fengur að fá Ásgeir til liðs við fyrirtækið:

„Það skiptir miklu máli fyrir Kaptio að fá reynslubolta eins og Ásgeir til liðs við okkur, sem býr ekki aðeins yfir mikilli tæknilegri reynslu heldur þekkir hann ferðaiðnaðinn út í gegn úr sínum fyrri störfum hjá Icelandair og Advania.“ 

Kaptio er alþjóðlegt hugbúnaðarfyrirtæki sem smíðar bókunar- og viðskiptatengslahugbúnað fyrir stór alþjóðleg fyrirtæki í ferðaþjónustu. Síðastliðin ár hefur Kaptio verið í stöðugum vexti og starfa nú um 50 manns hjá félaginu.

• Blogga um frétt