Ekki verður greiddur arður í ríkissjóð

Samkvæmt rekstrarreikningi var tap af rekstri Seðlabanka Íslands tæplega 16 milljarðar króna á árinu 2021 en árið áður var hagnaðurinn rúmlega 68 milljarðar króna.

Frá þessu greindi Gylfi Magnússon, formaður bankaráðs Seðlabanka Íslands, í ávarpi sínu á ársfundi bankans, sem haldinn var í Silfurbergi í Hörpu klukkan fjögur í dag.

Að sögn Gylfa má tap af rekstri bankans að mestu rekja til virðisbreytinga erlendra eigna, vegna gengissveiflna.

„Rekstrargjöld bankans voru um 7,8 milljarðar króna, um fimm prósentum hærri en árið á undan. Rekstrartekjur á árinu voru tæpir 3,7 milljarðar króna, eða um 9 prósentum hærri en árið áður,“ sagði hann.

Frá ársfundi Seðlabanka Íslands í dag. Ljósmynd/Kristinn Magnússon

Þá hafi eignir bankans numið tæplega 694 milljörðum króna í lok ársins, sem sé um 121 milljarði hærri fjárhæð en í lok ársins 2020. Eigið fé hafi lækkað um 17 milljarða króna og var um 134 milljarðar króna í árslok.

„Eiginfjármarkmið bankans sem bankaráð hefur staðfest er 150 milljarðar króna. Ekki verður greiddur arður í ríkissjóð vegna ársins 2021 vegna taprekstrar og eiginfjárstöðu undir eiginfjármarkmiði.“

• Blogga um frétt