Sigurður Örn Ágústsson, forstjóri flugfélagsins Bláfugls, hefur ákveðið að hætta störfum sem slíkur. Við starfinu tekur Audroné Keinyté frá Litháen, en flugfélagið er í eigu litháíska félagsins Avia Solutions Group.
Sigurður tilkynnti starfsfólki fyrirtækisins þetta í tölvupósti í morgun, en breytingin tekur gildi strax í fyrramálið.
Í samtali við mbl.is segir Sigurður að upphaflega hafi hann ætlað að sinna starfi forstjóra í skamman tíma, en nú séu þegar liðin tvö ár. Á þessum tveimur árum hefur félagið tekið stakkaskiptum. „Á þessu ári mun floti Bláfugls telja 15-18 flugvélar, tekjur hafa meira en tvöfaldast, við höfum bætt við okkur stórum viðskiptavinum, ráðið inn mjög hæft fólk, og félagið er tilbúið að fara í næsta fasa vaxtar.“
Hann kveðst munu halda áfram sem stjórnarformaður Bláfugls. Samhliða því muni hann verða sérstakur ráðgjafi stjórnarformanns Avia Solutions Group, eiganda Bláfugls.
„Það eru mjög spennandi tímar fram undan hjá Bláfugli og ég hlakka til að vera hluti af því, þó það sé á öðru stigi en að vera forstjóri í þessum daglega rekstri. Félagið er í góðum höndum hæfra starfsmanna og stjórnenda.“
Bláfugl starfar undir hjáheitinu Bluebird Nordic. Félagið var stofnað árið 1999 og hóf flugstarfsemi árið 2001 með íslenskt flugrekstrarleyfi.
Stærstur hluti rekstrar Bláfugls fer fram utan Íslands, en félagið félagið starfar einkum á svokölluðum blautleigumarkaði (e. Wet Lease) erlendis og flýgur þannig fyrir önnur félög, s.s. DHL, UPS og ASL/FedEx og fleiri.
Greint var frá því í ágúst á síðasta ári að félagið hygðist bæta við sig 25 Boeing B737-800-flutningaþotum fyrir lok árs 2024, og fjölga þannig vélum í flota sínum úr átta í 33.