Elon Musk í stjórn Twitter eftir kaup

hlutabréf

Elon Musk, forstjóri bílaframleiðandans Tesla og geimfyrirtækisins SpaceX, mun taka sæti í stjórn samfélagsmiðilsins Twitter í kjölfar kaupa á tæplega 73,5 milljónum hluta í fyrirtækinu.

Eign Musks í Twitter samsvarar um 9,2% hlut og er hann því orðinn stærsti hluthafi félagsins. Sem dæmi á hann nú fjórum sinnum stærri hlut en stofnandinn, Jack Dorsey, sem hætti sem forstjóri í nóvember sl.

Twitter tilkynnti stjórnarsetuna í gær og sagði forstjóri fyrirtækisins, Parag Agrawal, að eftir samræður síðustu vikna við Elon hefði þeim orðið það ljóst að hann myndi verða mikill og góður liðsauki inn í stjórnina. Þá bætti hann við að „sem ástríðufullur áhangandi og ákafur gagnrýnandi“ þjónustunnar, þá væri hann „nákvæmlega það sem við þurfum“.

Hlakkar til að bæta Twitter

Elon Musk sagðist í framhaldinu hlakka til að vinna með Parag og stjórn Twitter við að bæta miðilinn umtalsvert á næstu mánuðum.

Sem mögulega tilvísun í hvernig hægt væri að bæta miðilinn setti Musk skoðanakönnun í gang á Twitter í gær. Þar spurði hann 80 milljón fylgjendur sína hvort þeir vildu sjá breyta takka (e. edit button) á forritinu – en kallað hefur verið eftir þeirri breytingu mjög lengi í Twitter-samfélaginu. Sú hugmynd er, eins og sagt er frá á vef BBC, orðin að eins konar innanhússgríni meðal Twitter-notenda.

Jafnvel Agrawal sjálfur var með og endurtísti könnuninni á sínum eigin reikningi og skrifaði: „Afleiðingar þessarar könnunar verða mikilvægar. Vinsamlegast gætið vel að því hvað þið kjósið.“