Niðurstöður rannsókna á svæðinu í kringum Vagarhrygg á Suður-Grænlandi sýna fram á að þar er að finna mun meira gull en áður var talið og að vænlegt gullvinnslusvæði sé umtalsvert stærra en fyrri rannsóknir bentu til.
Þetta kemur fram í tilkynningu sem send er út fyrir hönd AEX Gold.
„Á árinu 2021 lagði AEX Gold Inc. Í umfangsmikla rannsóknarvinnu á Vagar leitarsvæðinu, sem m.a. fól í sér notkun, rafsegulmælinga, steinefnakerfislíkana, myndgreiningar úr lofti og af jörðu og greiningu könnunarsýna,“ segir í tilkynningunni.
„Niðurstöður rannsóknanna benda til þess að á Vagarhrygg sé að finna allt að fjórar vinnsluhæfar gullæðar, en gullinnihald í könnunarsýnum var allt að 86,7 grömm í hverju tonni af grjóti. Þar fyrir utan er innihald gulls í berggrýti utan æðanna verulegt, eða allt að 14,4 g/t. Í hefðbundinni neðanjarðarnámu er hlutfall gulls á bilinu 4-6 g/t.“
Þá kemur fram í tilkynningunni að mögulegt vinnslusvæði hafi verið metið á tvo ferkílómetra en nú er það metið á fjóra.
„Áður hefur verið borað á Vagarhrygg og var gullinnihald í borkjörnunum það hæsta sem fundist hefur á Grænlandi, eða yfir 2000 g/t. AEX metur gullmagnið á svæðinu svo mikið að um sé að ræða einn stærsta gullfund síðustu 20-30 ára í heiminum öllum og að Vagarhryggur geti orðið eitt mikilvægasta gullvinnslusvæði heims, eða „elephant deposit“ eins og slík svæði eru stundum kölluð. AEX ætlar að framkvæma frekari tilraunaboranir á svæðinu í sumar til að sannreyna þá kenningu.“
„Niðurstöðurnar frá Vagarhrygg eru einstaklega hvetjandi. Við höfum alltaf staðið í þeirri trú að umtalsvert meira magn af gulli væri til á Vagar svæðinu og að vinnslusvæðið gæti verið mun stærra. Niðurstöður rannsóknanna sýna að þessi trú okkar var á rökum reist,“ er haft eftir Eldi Ólafssyni, forstjóra AEX Gold, í tilkynningunni.
AEX var stofnað árið 2017 með megináherslu á gullleit og -rannsóknir á Grænlandi. Fyrirtækið er með leyfi til að leita að og vinna gull og aðra verðmæta málma í Suður-Grænlandi. Stærsta eign AEX er Nalunaq gullnáman, sem verið er að koma aftur í vinnslu.
Hlutabréf AEX eru skráð í kauphallirnar í Toronto og London, en meðal stærstu hluthafa í félaginu eru íslenskir fjárfestar, þjóðarsjóðir Grænlands og Danmerkur og stærsti lífeyrissjóður Grænlands.