Ásdís Kristjánsdóttir, nýr bæjarstjóri Kópavogs, segir í samtali við mbl.is að sveitarfélagið ætli að lækka skatta vegna hækkunar fasteignamats.
„Í sáttmála nýs meirihluta sem ber heitið „Áttaviti til árangurs“ er tiltekið að fasteignaskattar lækki til að koma til móts við frekari hækkun fasteignaverðs enda má í raun segja að bæjarfélagið sé áfram að veita sömu þjónustu þrátt fyrir hækkun fasteignaverðs. Með þessu erum við koma til móts við þessar hækkanir,“ segir Ásdís.
Samkvæmt nýju fasteignamati Þjóðskrár Íslands fyrir árið 2023 hækkar heildarmat fasteigna á Íslandi um 19,9% frá yfirstandandi ári. Almennt er hækkun á íbúðarmati á höfuðborgarsvæðinu 23,6%.
„Miklar hækkanir á fasteignamarkaði hafa meðal annars ýtt undir hækkun vaxta sem hefur bein áhrif á heimili og fyrirtæki,“ segir Ásdís.
„Mikilvægt er að sveitarfélögin haldi áfram að úthluta lóðum til uppbyggingar svo jafnvægi náist á húsnæðismarkaði. Kópavogur mun axla ábyrgð og ég vænti að önnur sveitarfélög geri slíkt hið sama. Í tilfelli Kópavogs er takmarkað landrými til að byggja upp ný hverfi en framundan er þó áhugaverð uppbygging og áframhaldandi þétting byggðar.“